الشراء من الأنترنت خطوة بخطوة

 المقالة  هذه  راح يخليك بإذن الله تفهم كلش على بيمن تقدر تشري عبر الانترنت مرانيش نقولك هدا احسن شرح لكن برك تبع وركز في الكلام وخليلي رأيك في التعليقات.

الشراء عبر الانترنت بالمختصر المفيد في منشورنا الأول راح يكون على يمن تشري، بطبيعة الحال أحد اهم الخطوات لي كي متكونش عندك ماراح تقدر دير والو.

البطاقات البنكية visa:

 هنا توجد نوعين من المواقع التي تقبل التعامل اما بالبطاقات البنكية او بدونها وسنفصل .

شوف هدي متكسرش راسك بزاف كاين مواقع لي تقبل فقط بطاقات بنكية (فيزا كارد أو ماستر كارد) . . . اصبر ماتتقلقش راح نفصلوا فيها.

وكاين مواقع تطلب منك إضافة إلى ما فوق "بايبال" . . . 

لذلك وجب عليك اقتناء احد البطاقات البنكية التالية التي تساعدك في عملية الشراء من الانترنت وخاصة غي بلد الجزائر.

صحا بطاقة بنكية عندنا بزاف خيارات : 

🔴 بنوك جزائرية:

 لي حقيقة مراحش تساعدك تماما في عملية الشراء عبر الإنترنت، رسوم عالية وسقف محدد للشراء أسبوعيا وشهريا ومشاكل كبار مم الأفضل واحد يتجنبها ويخلي الحساب البنكي الـ 🇩🇿 للتعاملات المحلية فقط ولا كي تحصل.

🔴 بنوك عالمية 

كاين الكثير منها لكن بالمختصر المفيد أحسنها حاليا بايسيرا ،

وكذلك بطاقة wise .

شوف تبع معايا مليح بايسيرا بنك ليتواني تحتاج باش تخدمها لحاجات بسيطة بطاقة تعريف بيومترية ولا جواز سفر + عنوان أوروبي (الأولى باش تخدمها لازملك ملف و وهو شها . . . ريح . . . ريح، من نيتك راح تبع هديك بلدية ريڨلي امورك 🙏) + 11 اورو وكاس 🍹

- عنوان أوروبي:

 متتفلسفش بزاف أبدا 

1.  عندك صديق ولا فرد من العائلة في كاش بلد أوروبي(يقدر يكون كغيم هداك لي يجي يجوز الصيف عندكم قال يفيدك في حاجة)  
2. نعم 🌹 اوك حاجة هايلة قولوا يعطيك عنوان ديالو وسجل نتا من خلال التطبيق وادخل العنوان كيما مدهولك كي توصلوا مشي لازم يعاود يبعثهالك ولا تسناه حتى يهبط اذا كنت داير فيه ثقة يكفي برك يصورها من الامام والخلف. وتقدر تستعملها بشكل عادي.
3.  لا لا معنديش ⬅️ ساهل تشوف صفحة أو شخص يخدمها بكل بساطة يتكفل بكلش نتا توصلك مباشرة للدار الأسعار تقريبا راهي 3500دج، هنا مراح نرشحلك حتى إنسان لكن كاين بزاف ادامنة في 1001 يخدموها سقسي برك وراح توصل ليهم

 

صحا دوركا باش تسجل اكتب برك في يوتيوب تلقى مئات الشروحات لي تقدم كيفية التسجيل وهو ساهل كيما تفتح فايسبوك ولا تسجل في موقع اخر برك عندك مسألة تع ترفعلهم بطاقة تعريف ديالك. ويكفيك تطبيق الهاتف باش دير كلش.

سعر اصدار البطاقة هو 11 أورو بالتوصيل.

هدي أولا قلنا بطاقة بنكية ها خلاص بعد وش حكيت الفوق مضنيتش تزيد تسقسي على حاجة في بايسيرا.

البايبال :

البطاقة لي الفوق تخليك تقدر تشري من أي مكان تحب في العالم ؟ وتقدر منا تسقسي علاه نزيد عليها ونستعمل بايبال ؟ 

ليوم راك عاجبني راك تسقسي غير في قلب الحبة

وانا راح نمدلك غير وش تسحق بلا منكثر عليك بايبال بكل بساطة شفت نتا كي تشري من كاش موقع راح دخل معلومات تع بطاقة ديالك ويقدر يكون هذاك الموقع مخترق، ولا سيد لي حاكموا هوا اصلا سراق ويديلك معلومات تع بطاقتك، ويولي يخدم بيها،

 صحا هنا يجي بايبال يقولك سجل عندي حط لاكرط ديالك داخلي، وكي تشري حط برك ايميل ورقم السري تع بايبال وهو يضملك في حالة سرقة،في حالة ماوصلكش المنتوج ولا وصلك مشي كيما مصور في الموقع وبزاف امورات، مهم بايبال كشغل هو محفظة لي تخبي فيها دراهمك وتشري بيها ديراكت بلا متجبد وش كاين الداخل.

صحا نتا وين تلقى موقع يتعامل بالبايبال استعملوا احسن باش تظمن حقوقك.

بايبال هدا ساهل نهار تكون عندك بايسيرا روح افتحوا كيما تفتح جيمايل اول مرة ساهل بزاف وتحتاج برك يكون عند 2 اورو في حساب الكارطا ديالك باش يتفعل وراح يكون عندك بايبيال جزائري مفعل. ومرة اخرى عندك موقع مجاني وسموا Youtube 

هنا تكلمنا اذا باش نشري هدا وش لازملك بطاقة بنكية أو بايبال وبطبيعة الحال زيدلها دراهم الموني الكاش . . . 

منين تجيب دراهم ؟ 

بكل بساطة زوج عملات لي نتعاملوا بيهم بزاف اورو، دولار ونتا تقدر تشري من اي موقع بأي عملة كانت والبطاقة ديالك راح تتكفل بالتحويل مع رسوم بطبيعة الحال علابيها الاحسن دايمن تشري من مواقع لي تدعم اورو في حالتنا مع بايسيرا.

منين نجيب اورو ؟ كاين زوج طرق 

اما هداك صاحبك ولا كغيم لي حكينا عليه الفوق من أي بلد أوروبي يبعثلك دراهمك بشكل سريع وفي 24 ساعة يكونوا عندك وبدون عمولة ونتا تخلصوا هنا دينار ولا كي يهبط نمدهملوا اورو السعر في هذه الحالة يكون تقريبا بالمفاهمة ودائما ارخس من الطريقة الثانية.

اذا كنت في زينة البلدان وماتعرف حتى واحد في هذا العالم شوف الصفحات ولا المجموعات المخصصة للامر هذا بشرط تسقسي مليح قبل ماتتعامل مع شخص هداك.

١- موقع الكستنجر الجزائري:

رابط الموقع (  رابط احالة افلييت  )

خدمة تحويل العملات الإلكترونية. افضل موقع لتحويل بدون منازع ،

 وراهي كاين مجموعة 1001 Devise والسعر راح يكون طالع شويا على السوق السودار تقريبا حاليا راه بين 207 و210 للأورو.

اذا بعد وش حكيت كامل الفوق حاليا ماعندك حتى حجة باش تقولي منعرفش بيمن نشري ركز في كامل الخطوات وكلها راهي مبسطة لأقصى درجة.

وعندك بداية من نشر هذا المنشور 24 ساعة سقسي وش راك حاب في بيمن نشري وراح نجاوبك بالتفصيل وحتى الناس تقدر تجاوبك في التعليقات.

طلب أخير نتا الآن كيما راك هكدا تطلب معلومة راح تتلقى بزاف ناس همها الأول والاخير انها تستغلك، منا خليك مع المعلومات المجانية لي راهي تجيك هنا وبإذن الله تبع برك راح توصل لأي معلومة تحب وراك شفت الأسلوب الفوق هكدا بعدها مراح تحتاج حتى انسان يفهمك في أي حاجة والله ولي التوفيق.

وبلا منوصيك صاحبك لي تشوفوا مغلوق في المعمات هدو جيبوا وخليه يستفاد يخي باطل .

المواقع التي تشري منها في الجزائر :

🔴  الشراء عبر الانترنت عن منين تجيب بطاقة مصرفية وكيفاه تعمرها ووشنوها أهم الطرق لي تقدر من خلالها أنك تشري عبر الإنترنت.

اليوم الدور على أهم المواقع لي يقدر الجزائري يشري من خلالها وأحسنها من كل النواحي ونقاط القوة الوعف في كل موقع.

بكل بساطة نتا مدام عندك البطاقة لي حكينا عليها في المشنور الأول ولا عندك بايبال وعندك شويا مصيرفية مبروك عليك سما تقدر تشري من أي مكان في العالم يبقاولك شويا امور أهمها اذا كان هذاك الموقع يرسل الى الجزائر واذا كان موثوق.

اليوم متكسرش راسك تبع بلعقل برك لأنو راح نهدر برك على المواقع والمتوقع منك انك تفهمها مليح وتعرف بلي هي موجودة وتعرف برك الطرق لي نقدرو نشرو بيها من هذه المواقع وطريقة الشحن.

 1️⃣ الغني عن التعريف المارد الصيني AliExpress 

هي شوف باش نكونوا واقعين هدا الموقع وحدوا راه بحر كبير لا ينتهي العالم كامل يشري منوا ويعتبر المنافس الاكبر لجيف بيزوس مول الـ Amazon، الموقع فيه وش تحتاج حرفيا من لبسة، هواتف، اكسسورات، اجهزة ذكية وكلش وش تحب من الـ A إلى Y لوجيك مشي للـ Z مفيهش الروينة والهندي هدوك تلقاهم حصريا في المارشي تع الحومة برك 😂

صحا وش تحتاج باش تشري منوا 

برك بطافة بنكية لي حكينا عليها في المنشور الاول وتسجل بخطوات بسيطة في االتطبيق او الموقع ديالهم، زيدلها لازم يكون عندك عنوان تع الدار هدي باينة كشغل وتان يون عندك الـ 💸

 المحاسن 👍🏻

- واجهة الموقع والتطبيق ساهلين بزاف وطريقة العرض رائعة وتخلي أي واحد مبتدأ يشري عادي.

- اسعار جيدة جدا مقارنة مع المواصفات سما رايحة في سمينة ورخيسة.

- يقبل بايسيرا بشكل عادي.

- يوفر طرق متعددة للشحن الى زينة البلدان.

- توفر عدد هيب من المنتجات وفي كل المجالات تقريبا بكل بساطة مستحيل تكمل تتصفح كامل وش فيه الموقع.

- تقيمات البائعين حقيقة في الكثير من المرات خاصة كي تكون مدعمة بصور حقيقية.

- دعم فني جيد ومتجاوب خاصة للحسابات لي تكون عندها مشتريات كثيرة

- توفر كوبونات وتخفيضات على مدار السنة

- يوم 11/11 هدا كشغل هو عيد العزاب ومنه يديرو تخفيضات كبيرة، كشغل رايح في الجمعة الكحلاء لي يديرها العالم كامل اذا راك سامع بيها.

المساوئ 👎🏻

- كثرة المنتجات والناس لي تبيع تخليك تتبحر ومرات بزاف طيح في متاجر غير موثوقة لذى لازم تحوس مليح وتقرا مليح التقييمات وتلقى متجر جديد من الاحسن متشريش عليه.

- الدعم شويا سامط في أيامك الأولى علابيها النصيحة الاولى لازمتخدم بيها بزاف كي تشري اول مرة سما خير مليح المنتجات لي تضمن بلي يلحقوك وتضمن بلي الجودة ديالها مليحة.

- مرات بزاف الصور الواقعية مختلفة تماما على الواقع خاصة في الملابس علابيها لازم تشوف التقيميات والصور الواقعية تع الناس لي شرات.

- منتجات بزاف تلقى الدعم لي موفرينوا للجزائر ثقيل بزاف وزيدلها مع البريد ديالنا هداك هو الحساب.

2️⃣ موقع Gearbest

 موقع جيد صيني كانت الشهرة ديالوو في الهواتف او الاجهزة الاكترونية خاصة مع خاصية الشحن السريع DHL مؤخرا ولا يعي وبزاف منتجات ولا ميدعمش الارسال ديالها لزينة البلدان بصح يبقى موقع مليح تضرب عليه طلة مرة على مرة.

فيه خاصية الدفع عن طريق البايبال راح تخليك تشري مرتاح بزاف وتظمن حقوقك.

 3️⃣ موقع banggood

 مزالنا ندورو في جمهورية الصين الله غالب هي جاية هكدا 

موقع خفيف ظريف دايمن مخليه في الاحتياط مرات يديرو فيه عروض شابين وتخفيضات جيدة.

⛔ كاين مواقع تان ننصح بيها لكن خليها نهار تكون تمرست شويا لانو راح تحتاجها في امور معينة برك كيما 

1. DH Gate 
2. sunsky-online 

wish انا شوف موقع ميعجبنيش في العروض هديك لي يقمها تع الاسعار المنخفضة بزاف بصح كاين بزاف ناس يشرو منوا برك اعرف تخير ومتروحش تبع السعر فقط.

وغيرها الكثير نزيدوا نتطرق اليها بالتفصيل في منشورات قادمة.

🚀 المواقع العالمية Amazon Ebay 

هدو باش منكذبوش على رواحنا مع الميزانة تع زينة البلدان شويا راح تلقى روحك مبحر لانو اسعار غالية لكن يبقى كاين امور تلقاهم لتم برك مثال جهاز كيندل راح تلقاه برك في امازون هنا المشكل لي راح تلقاه هو انو مواقع هذه لا ترسل الى الجزائر واذا رسلت في منتجات قليلة سعر الشحن راح يكون غالي بزاف علابيها الحل وشنو هو شركات اعادة الشحن لي تمدلك عنوان في بلد ما ونتا ماعليك غير تشري وتبعوا لعندهم وهوما يعاودوا يبعثه للجزائر حاليا لفرنسا نستعمل arseli ولامريكا ودبي نستعمل خدمة عربية بزاف شابة boxit4me 

شوف اذا مفهمت والو في الفقرة لي فوق راه جاي منشور تفصيلي نتكلم فيه على كلش.

المنشور تع اليوم تفهم منه انو اول موقع عليك تجربوا لشراء عبر الانترنت هو aliexpress وفي المنشور القادم راح نتكلم بالتفصيل عليه وراح تخرج بإذن الله وتروح دير أول عملية شراء ليك وتنتقل لأمور اخرى ان شاء الله.

ونزيد نذكركم انو كل أسبوع راني ندير منشور تجميعي نستقبل فيه اسئلتكم حول مواضيع الشراء عبر الانترنت كونوا في الموعد!

الشراء من بلدان لا تدعم الشحن الى الجزائر :

كيف تشتري من الانترنت في الجزائر من الالف الى الياء 

بعدما كنا تكلمنا عن الشراء عبر الانترنت وفصلنا فيه بشكل كامل ومتكامل اليوم نزيدو نتوسعوا و نحكيو على كيفية الشراء من المواقع أو البلدان التي لا تدعم الشحن المباشر للجزائر. كل المنشورات السابقة تلقاوها في المجموعة تحت هاشتاغ

بعد موضوع اليوم وجد دراهمك لانو راك تولي قادر من الشراء في أمريكا، فرنسا (وبذلك كل البلدان الاوربية تقريبا)، بريطانيا، الامارات اي شيء من هنا، الصين، اليابان، اندونيسيا، الفلبين . . . خلاص هدو يكفوك 😂

بكل بساطة كي زادت نسبة الناس لي تشري عبر الانترنت ولات الكثير من المواقع تدعم فقط الشحن المحلي للتركيز أكثر على أعمالها و تان باش تخرج من مشاكل الشحن الدولي وكل مايتعلق به، هنا ظهرت بكل بساطة شركات مهمتها الأساسية أنها توفر لك عنوان في تلك البلاد وتقوم بإعادة إرسالها لك في اي منطقة في العالم وبما انو الجزائر نوعا ما من هذا العالم وتقريبا معظم شركات إعادة الشحن تدعم الارسال لزينة البلدان !

بصح علاه تحوس تشري من هذه البلدان مشي هي نوعا من الزيادة عليها ؟ كاين alilo وجامي غلط معانا . . .

وش نقولك هي كل واحد حر في دراهموا وشحال من مرة تلقى مثلا عرض في امريكا ولا فرنسا ونتا مسحق الشي هداك وتكون في حاجة لشرائها وتبقى لكل واحد وش يحب بطبيعة الحال.

سما شركة هدي بكل بساطة نتا تكري عندها عنوان يعني يولي في عوض العنوان تع داركم تحط هداك العنوان لي يمدوهولك ونتا ماعليك غير دخل العنوان هداك في الموقع لي راح تشري منو تدفع والسلام . . .

تلحق السلعة عند الشركة هيدك يصوروها (كاين لي باطل وكاين بمقابل) بعدها يسناوك نتا وش تحب اذا راح تزيد تشري باش تجمعهم ولا راح تعاود تبثعها مباشرة لبلادك. يعني تقدر نتوما 5 من العباد تتفاهموا وتشرو كامل كيف كيف ديرو تجميع وتعاود تبعثهم.

الخدمات هذه تجد عنها مئات الفيديوهات عبر الانترنت لكن ما أحدثك عنه هنا هو تجربة شخصية لمرات عديدة في الشراء من امريكا، اوروبا، دبي، والهند !

🚨 الشراء من فرنسا وأوروبا بشكل عام :

بحكم أن الجالية هناك متواجدة بكثرة من الاحسن يعاونك هادك وليد خالتك كااغيم وين تشري تبعث ليه وهو يعاود يبعتلك بصح ادا كنت وحداني غريب وما عندك حتى واحد لتم الخيرات على راسها وبدون ترتيب نرشحلك

موقع او صفحة Airselli جزائريون الخدمة شويا مشي احترافية في ناحية تنظيم بموقع، لكن الاسعار جيدة ومنافسة،

موقع porsay، موقع مرتب جيد خدمة عملاء في المستوى.

موقع colisexpat موقع فرنسي يقدملك ايضا عنواين في اسبانيا، المانيا، امريكا.

بكل بساطة منين تحب تشري كل هذه المواقع تمدلك عنوان ورقم هاتفي وايضا رقم خاص باش يفرقوا بين الشحنات نتا ماعليك الا الشراء من المواقع المختلفة وتكتب المعلومات لي مدولك هوما ومبروك عليك بعدها كي تصول عندهم راح يعاودو يبعثوها لعندك مقابل رسوم ونتا تحكم شكون الافضل بيهم.

🚨 الشراء من امريكا :

أمريكا الدار الكبيرة كيما يقولوا عشرات المواقع تقدم عنوان هناك لي مجربها ونعتبرها الاحسن

خدمة BOXIT4ME خدمة جيدة جدا وراح نهدر عليها في موضوع لوحده ان شاء الله فريق عربي ودعم متكامل وخدمات ممتازة الصراحة الاسعار صراحة ليست الأفضل لكن تبقى الخدمة مقبولة جدا. زيد العنوان الامريكي جاي في ولاية مفيهاش ضرائب وهو أمر جديد جدا.

خدمة colisexpat اسعار عجبتني فيه ومتنوعة وتعطيك بزاف اختيارات

خدمة myus مجربتهاش شخصيا لكن نعرف شحال من واحد جربها وكانت النتائج جيدة جدا.

🚨 الشراء من دبي.

دبي المختصر المفيد لأكثر من 5 مرات في 2020 التجربة كانت مع boxit4me الافضل وبلا تكسار راس ايضا، ولا تشوف انسان لتم يريقليك ويشحنلك من كاش شركة aramex fedex Dhl

🚨 الشراء من الهند !

نعم اسيدي تقدر تشري من الهند تان وبكل بساطة شركة boxit4me تقدملك عنوان لتم وتقدر تشري انا تجربتي كانت من امازون الهند والتعامل من الخدمة حقيقة لم يكون في المستوى يعانوا من مشاكل لتم هي في الحقيقة واحد مينصحش انك تشري من لتم لكن أن لزم الامر وتسحق حاجة تبالي الاحسن تشوف في فايفر كاش هندي يشريلك ويشحنلك ونتا تخلصوا ! نصيحة هنا برك شوف انسان لي تقييماتو عالية في فايفر وايضا متتعاملش خارج الموقع باتتا وإذا معول على هاتف للاسف في 2020 الأمور لتم راهي مزيرة بزاف ولازملك بزاف تراخيص باش تخرجوا لتم.

بيمن نشري ؟

التجارب للفوق كانت بمحبوبة الجماهير بايسيرا إما مباشرة أو عن طريق بايبال.

كاين طريق ثانية مثلا حبيت تشري حاجة من اندونيسيا وملقيتش بيمن تشري ولا مقبلوش البطاقة ديالك، بزاف من الشركات الفوق تقدملك خدمة الشراء يعني تبعثلهم رابط وهوما يدبرو راسهم يشرولك مقابل رسوم بطبيعة الحال.

نصائح بسيطة :

حاول تشري من المواقع الموثوقة كيما امزون واذا شريت من ايباي شوف بائع لي يكون تقييم جيد من غير هذيك متخافش ايباي حقك مضمون على اخر سنتيم.

دايمن قارن بين الاسعار في الصين والاسعار في المواقع العالمية (مع أخذ بعين الاعتبار الجودة بطبيعة الحال).

سعر شحن غالبا يكون غالي لكن حاول تقسم الشحنات بين صحابك تشوف 3 ولا 4 تشريو كيف كيف وتقسمو بيناتكم سعر الشحنة مثلا 80 دولار تقسموها تجيكم 20 دولار لكل واحد وهوا مبلغ جيد خاصة كي يكون من امريكا.

اذا كان عندك سؤال في الموضوع او عن طريق الشراء مرحبا بك في التعليقات