مراجعة للهاتف Samsung a52 بعد تجربة أولية دامت 10 أيام،

 مراجعة شخصية للهاتف بعد تجربة أولية دامت 10 أيام،

10 days with Samsung a52 8/128 4G

Samsung a52 

قبل ما نبدا ملاحظاتي نقولكم بلي كان عندي A6+ لي خرج في 2018 ...

المهم بسم الله ،

✅ التصميم

أول سبب خلاني نشري الهاتف هو التصميم تاعو، ربما كاين ناس مايعطوش أهمية للنقطة هادي لكن شخصيا هاتف مشي شباب مانشريهش ،

قريب حولت للآيفون عام لي فات غير على جال سلسلة s20 و A لي بالنسبة ليا التصاميم كانو كارثة ..

بعدها سامسونج تداركت الأمر مع سلسلة النوت و بعدها s20 FE

. الهاتف جاي قريب ليهم في اثنين و قريب أيضا للـ s21 ULTRA بدرجة أقل و لو أن بزاف ناس يحسبوه هو كي يشوفوني رافدو 😆

الظهر من بلاستيك مطفي، صراحة ما أزعجنيش الأمر و كنت متخوف منو شوي بصح الحقيقة يعطي ملمس مليح و ما يحكمش البصمات بزاف و أيضا نفس وزن الهاتف السابق تاعي.

✅ الشاشة :

من الحاجات لي شكلتلي فارق كبير هي الشاشة لأن أبعاد الهاتف هذا نفس أبعاد الهاتف القديم لكن الشاشة تفرق من 6 إنش إلى 6 و نصف .

بلا مانحكو على الألوان و الدقة مع سامسونج مكاش منافس ♥ لكن الحاجة لي خلاتني نتمتع أكثر هي سرعة التحديث 90 هارتز *أصحاب 60 لقد كنا على ضلال 😂* فرق كبيير و لو أنني كنت متمني تكون Adaptative

*إطار الشاشة متساوي من كل الجهات ما عدى الأسفل و هذا الشي أزعجني شوي

✅ الأداء:

مانقدرش نحكم عليه من الآن لكن معالج SD 720G جربتو فأعلى الإعدادات ف بابجي و مادارليش حتى مشاكل ، التعامل مع البطارية 4500 ميلي عجبني تشدلي كامل النهار مع الإستخدام الثقيل و لو أنني بلعاني جربت نخدم بيه بزاف في الأصل نقدر نقول أنني مستعمل متوسط للهاتف مانلبعش بيه بزاف لكن رام 8 كانت كافية و البطارية كافية *مثلا الآن راهو 55% بعد 12 ساعة استعمال متوسط 😃*.

✅ السيستام android 11 & ONE UI 3 :

أيضا من الحاجات لي عجبوني لأنهم كانو غايبين في الهاتف السابق

و لو أنني افتقدت بعض المميزات كيما غلق البصمة بدون ما نعاود نشعلو لي كانت مباشرة في one ui 2 . أيضا تكفل النظام بالرسائل المنبثقة كيما ماسنجر ... قلقني 😡 مشي كيما كان ماسنجر يخليك ترجع للقائمة تع الرسائل كيما تحب الآن ولات كيما آيفون تدخل التطبيق قبل * ماهيش بطيئة بصح تبقى أبطء من أنك تفتح قبالة*

✅ الكاميرات:

ما استعملتهمش بزاف باش نحكم من الآن ربما ندير منشور آخر عليهم بصح نعطي رأيي :

الصور ممتازة و المعالجة جيدة حتى في الإضاءة المنخفضة ، كاميرا الماكرو زيادة برك لوكان عوضوها بحساس الضغط ربما أفضل ، الزاوية العريضة عجبتني كأول تجربة لي معاها ربما تكون ضعيفة بالنسبة لهواتف رائدة أخرى شفتها لكن قنعتني ، و الفيديو 60 إطار مع التثبيت الجديد حاجة شابة بزاف ♥

كاميرا السالفي عجبتني و أفضل من واش كان عندي ، خاصة في الليل وين تعطي نتيجة أفضل من الهاتف لي كان عندي لي كان فيه فلاش أمامي أيضا ، لكن يبقى مشكل الأندرويد هو الكاميرا في التطبيقات كيما انستغرام و سنابشات و و و ... المعالجة تضعف بسبب أن التطبيقات هاذي تصور الشاشة من الكاميرا مشي كيما الأيفون يستعمل مباشرة الكاميرا * مشكلة مطوري التطبيقات مشي الكاميرا* ..

✅ إضافات أخرى

-الهاتف مقاوم للماء بشهادة IP67 جربتو و مادارليش حتى مشكل و نظن هادي حاجة مليحة بالنسبة لهاتف في الفئة المتوسطة

-بصمة الشاشة 😫 سيئة و بطيئة مقارنة مع الهاتف السابق، و لو أن عندها حل تع تسجل بصمتين في بصمة واحدة ثم تسجل كل بصمة وحدها.. بصح تبقى بطيئة شوي ، ونظن هادي مشكل نظام لأن هاتف كيما رينو 5 عندو نفس الحساس ونفس المعالج لكن يقدم أداء أفضل.

-الفتح بالوجه سريع بصح كيما قالو هوما غير مضمون 100%

كانت هذي تجربتي مع الهاتف و لي عندو ملاحظة أو أسئلة يتفضل

مر اجعة من نشر Aymen Amokrane  نشرها على المجموعة.